我係急症室醫生,教你發夢受傷點睇醫生

avatar 九月 10, 2019

我係急症室醫生,教你發夢受傷點樣睇醫生。

image

記住你同文員登記,如果唔俾身分證而俾佢留難,就話:「我唔記得身分證號碼,而家無帶係身,我要睇醫生,麻煩你開unknown id,我家人會拎證比我後補。」
多數佢會將你個身分證換成UX#######,一間間急症室唔同,可應係UH/UM/UY諸如此類。同時你每次睇都會有一個AE號碼,務必要記住個號碼。登記UX#時,地址電話9/唔填都ok。

正常你一世人點都睇過公立,電腦入面你身分證嘅紀錄除咗有病歷,仲會有個人資料包括地址同埋緊急聯絡人資料,所以如果俾黑心嘅人見到而供你出去係好麻煩(當然我相信絕大部份醫護係唔會,我講緊其他有可能喺現場做嘢嘅人)。

睇醫生除左要獲得治療,仲係有驗傷嘅作用。正常情況非發夢如你比人打而又報咗警,警察會即場請醫生填一張驗傷報告,報告上面係要有病人同意同簽名醫生先會填。一般醫生未必會核對簽名係唔係真確,而且好多時d警察會起個病人走左先比張form醫生,你係可以主動醫生表明你願意/唔願意比資料。正常情況下,呢份報告係比警察用嚟拉打人果個同埋決定落咩charge,例如少少損咗瘀咗就普通襲擊,爆江斷骨就嚴重傷容他人身體。

image

睇完醫生,無論有無報警,你係有權自己申請醫療報告,尤其係如果你係純粹路過,有好強烈不在場證據,返屋企途中無啦啦俾人摳,又或者好似7警咁有明顯使用不必要武力行私刑,呢份報告就成為反告警方嘅證供。

如果你有反告嘅意圖,你記得個AE號碼就可以申請。如果你係用unknown id(UX#),一般來講好難證明份報告係你嘅。你可以選擇:睇完晒醫生,離開之前返去急症室,係周圍無警察時向登記文員出示身分證同埋你張籌update你病歷上資料,咁就可以避免現場比人圍同拉。

如果都係好怕比人篤魁,而又有反告嘅打算,可以唔咁做,照搵律師幫手拎報告,但當日一定要自己影低傷勢,要有樣,等告起上嚟多啲證據。記住,急症室現場醫生唔一定可以睇到晒所有傷勢,尤其係皮外傷,多數注意力去左處理左比較危險嘅傷勢,如果佢有漏,你可以禮貌地提佢,穩陣起見點都自己影埋相,返到屋企先影,醫院附例唔比影相架。

當然,如果你係單純睇醫生,咁睇完就走得,乜都唔好講,唔好update ID,無必要唔好覆診。

image

有關受傷嘅原因時間地點,之前都有人解釋過。醫生只係大概需要知道你點整親,例如仆親,俾人用硬物打,俾利器整親,俾不知名飛行物擊中,原因係評估你傷勢。地點唔重要。而時間唔係唔重要,而係唔需要太準確,即係你話今日就可以,唔一定要講幾點。記住你唔需要講大話,你只需要講最少嘅內容就得,但吹要有個譜,舉例如果傷口耐過24小時,多數係唔會即刻聯針架!

以上講法係假設你唔想比任何人追究到,唔想有機會喺急症室比現場警察拉,咁下面就唔需要睇落去。除非警察亂咁gup,醫護人員係唔會同警察講任何你嘅資料架!

如果係唔係夢遊,而係住客落樓比警察打,又或者警察圍毆你,你想告警察,而你份醫療報告上面寫嘅時間地點,或受傷機制同你嘅證供有出入,係有機會出問題。記住,醫療報告並唔能夠證明你點受傷,只能夠提供證據作邏輯推論,例如你同官話比人用棍摳,但報告傷勢係狗咬,咁證供同傷勢唔吻合就好有問題。如果你話比棍摳,而又有鏡頭影到事發經過,所以證據吻合,告得入機會係大啲。

我有問話律師朋友,你同醫生講嘅「時間」同「地點」同「事發經過」而寫咗落報告,並唔能夠證明你真係在場或者唔在場,又或者作為受傷原因嘅絕對證據,法官係會參考晒所有野去判。例如,如果你無同醫生講係比警察打,但有鏡頭影到,其實都告得入。調返轉如果你講左,但無其他證據,個官都有可能參考報告嘅內容去判斷你係唔係真係俾警察打。

如果你已經俾人拉左,打死都要求去睇醫生,因為有報告先有可能反告。如果你走得甩但要睇醫生,你就認真思考下你想點樣睇醫生最好。無論如何,影低所有傷勢,第時一定有用。

image

(2217)

搜尋

喜歡我們的文章嗎?按個讚吧!

x